Yeh kadamb ka ped agar maa hota yamuna thirey!
Mai bhi uss per baith kanhaiya banta dhirey dhirey!!
Le daiti yadi mujhe bansuri tum do paise vali!
Kisi tarhan nichey ho jaati yeh kadamb ki daali!!
Tumhe nahi kuch kehta per mai chupke-chupke aata!
Uss nichi daali se amma, unche per chad jaata!!
Vahin baith fir bade mazey se mai bansuri bajata!
Amma-amma keh vansi ke swarr se tumhe bulata!!
Sun meri bansi ko maa tum itni khush ho jaati!
Mujhe dekhne ko tum bahar kaam chhod ker aati!!
Tum ko aata daikh bansuri rakh mai chup ho jata!
Patton mai chhip ker fir dhirey se bansuri bajata!!
Bahut bulane per bhi maa jab nahi utter ke aata!
Maa, tab maa ka hriday tumhara bahut vikal ho jaata!!
Tum aanchal faila ker amma vahin ped ke nichey!
Ishwar se kuch vinti kerti baithey aankhen michey!!
Tumhe dhayan mai lagi daikh mai dhirey dhirey aata!
Aur tumhare failey aanchal ke nichey chhup jaata!!
Tum ghabrakar aankh kholti per maa khush ho jaatin!
Jab apne munne raja ko godd mai hi paatin!!
Issi tarhan kuch khela kerte hum-tum dhirey dhirey!
Yeh kadamb ka ped agar maa hota yamuna thirey!!
-By Subhadra Kumari Chauhan
No comments:
Post a Comment